4 أسباب للسلوك الغير مرغوب و كيفية التعامل معها

Date

2018/11/25

Profile pic

أخصائية تحليل سلوك تطبيقي - BCBA

في هذا الفيديو  تتحدث أخصائية  تحليل السلوك التطبيقي رزان عن أسباب ووظائف السلوك الغير مرغوب

إذا في عند طفلنا سلوكيات وحابين نعرف كيف نتعامل مع هاي السلوكيات شو ما كانت عض أو هروب أو بكاء أي إشي لازم نعرف إنه في 4 أسباب لكل السلوكيات وهي كالآتي:

  • أول سبب إنه الطفل عم بهرب من إشي أو عم بخلص من إشي مثلاً ممكن طفل يعض حدا يطلب منه إشي قوم جيبلي كذا فبعض فبروح هاد الطلب منه فبهرب من إشي أو مثلاً بكون قاعد بالصف حدا بقوله اكتب بعض تطلع من الصف فهو كل مرة بالفعل لما بعمل هاد السلوك العض عم بخلص من إشي هو ما بده اياه.
  •  تاني سبب إنه الطفل عم ياخد انتباه الإنتباه ممكن يكون إيجابي وممكن يكون سلبي، في أطفال أكبر مثال ممكن يعني أفكر فيه إنه عادةً بنشوف أهل بدون ما يحسوا بعمل الطفل سلوك فبصيروا يقولوله خطأ خطأ كل ما يعمله وبزيد السلوك لإنه بكون عم بستنى الطفل عم بتعزز السلوك عن طريق الانتباه بكلمة خطأ، فهاد سبب تاني إلي هو لفت الانتباه.
  • تالت سبب إنه الطفل بكون عم بياخد إشي حسي يعني مثلاً ممكن شعور حسي زي ما احنا بكون عنا شعور حسي زي مثلاً ممكن في ناس بدخنوا، في ناس بأرجلوا بأرجلوا أو بدخنوا عشان بعطيهم هاد السلوك شعور حسي، الأطفال إلي عندهم احتياجات خاصة بعملوا حركات زي بخبطوا راسهم بالحيط أو بعملوا هيك هاي ممكن عم تعطيهم شعور حسي فبضلهم يعملوه شو ما عملنا حتى لو حكينا إلهم خطأ أو أعطيناهم إشي تاني يلعبوا فيه بضلهم يعملوا هاي الحركة ما هم نعطيهم إشي بديل لهاد الشعور الحسي، فهاد تالت سبب.
  • رابع سبب إنه ممكن الطفل بكون عم باخد بده إشي ملموس، عم باخد إشي ملموس زي مثلاً لعبة، شوكلاتة، وقت زيادة في إشي مثلاً هو قاعد بلعب برة وأهله بيقولوله تعال ادخل فبقوم ببكي فبقولوله طب خلص بعطيك كمان دقيقة فهو برجع باخد النشاط الي كان عم بعمله إلي هو عم بلعب برة عشان بكي.

فهاي الأربع أسباب فأي وقت بنشوف سلوك لازم نعرف إنه إله سبب، السلوكيات عادةً إلها أسباب ودائماً بتكون تحت هاي الـ4 أسباب، كيف بدنا نعرف أي من هدول الأسباب إلي عم تخلي الطفل يعمل هاد السلوك؟ أهم إشي إنه نحاول نفسر شو الطفل عم يفكر لإنه دايماً لما بنفسر شو الطفل عم بفكر بنكون عم نطلع على الطفل من منظورنا وهاي دايماً بتصير ع الأهالي بكون الأب عنده شرح للموضوع للي عم بصير غير عن الأم لإنه كل واحد بطلع عالموضوع من وجهة نظره فأحسن إشي عشان نشوف إنه نطلع نحاول إنه نراقب الطفل ونشوف كل ما عم يعمل هاد السلوك أكون رأساً شو عم يصير ورا هاد السلوك، حدا عم بقيمه من إشي يعني مثلاً في ولاد بسكروا آذانهم مزبوط إنه هم عم يدايقوا من صوت بس يمكن كل مرة بسكروا آذانهم بطلعوا الأم أو الأب برة فبصير يعمل هاي الحركة تسكير الأذن عشان يطلع من موقف هو ما بده اياه فهاد بصير كأنه صار هروب، فدايماً لازم نطلع على إيش بصير رأساً وراه وبعد ما تشوف إيش بصير رأساً وراه بتحاول تصنفه تحت الـ4 أسباب عشان تعرف إيش سبب السلوك.