معايير دمج الأطفال ذوي التأخر التطوري في البيئات المختلفة

Date

2018/11/13

Profile pic

مسؤول المجتمع بمنصة حبايبنا.نت

في هذا الفيديو يتحدث مصطفى دنو أب لطفل من ذوي اضطراب طيف التوحد عن معايير دمج الأطفال في البيئات المختلفة. 

دمج أطفالنا في المجتمعات المختلفة هو من أكبر التحديات إلي بتواجهنا سواء بدنا نحاول ندمجه اجتماعياً في نادي أو مركز أو ندمجه أكاديمياً في روضة أو مدرسة على كل الأحوال الدمج إله عدة معايير بتكون هي بتشكل الجزء الأكبر من التحدي عنا، من أهم الأشياء إلي لازم نعملها أثناء مرحلة الدمج هو قبل مرحلة الدمج تهيئة الطفل بشكل صحيح، ما بصير إنه ابني بغض النظر عن قدراته إنه أنا أخده أحطه بمجتمع جديد عليه أو بيئة جديدة عليه، لازم أكون عارف هاي البيئة إلي رايح عليها شو رح تتطلب منه، رح تتطلب منه تفاعل؟ رح تتطلب منه استجابات معينة؟ يفترض إنه هو يكون سلوكه فيها منضبط بشكل ما، هل أنا هدفي أحدده أكاديمي أو اجتماعي من الدمج أو الإتنين سوا؟  أشوف شو نقاط الضعف فعلياً بكل منطقية وموضوعية وبناءً على أدوات تقييم معينة، شو أكتر إشي ابني بفتقده أو مهارة هو بحاجة إنه يطورها ويشتغل عليها بشكل أكتر، نهيئ الطفل قدر الإمكان على البيئة الجديدة.

في إشي كمان مش بس شغلتنا إنه نهيئ أطفالنا حتى يقدروا يتفاعلوا بشكل صحيح في أي بيئة، لأ كمان ممكن نساعد أطفالنا في عملية الدمج بإنه نحنا نهيئ البيئة لإلهم، نروح عالمكان المفترض إنه هم يتم دمجهم فيه سواء كان مدرسة، مركز، نادي أي إشي نروح عليه ونشوف كم عدد الأطفال؟ مين الشخص إلي حيكون مسؤول عنه؟ هل عنده اطلاع كافي عن وضع ابني؟ هل هو رح يقدر يتصرف معاه بشكل مناسب؟ هل هو متفهم قدرات ابني، مهاراته والأشياء إلي هو بارع فيها والنقاط إلي عنده فيها شوية ضعف وحابين إنه هو يشتغل عليها أكتر ونطورها؟ وهل رح يقدر يتعامل معه بهالإشي؟ واجبي كأب أو كأم مش بس إني أنا أدفع فلوس وأوديه وأجيبه، لأ وظيفتي كمان إني أنا أتابع معه، أكون ضمنياً بشكل ما عارف كل إشي رح يحصل معه ورح يتعرضله خلال الفترة إلي رح يكون بعيد عني فيها وإني أحاول إني أهيئ البيئة لإله وأهيئه للبيئة حتى نقدر نوصل لأفضل معادلة تساعد على دمج ابني في المجتمع أو المدرسة أو المركز.

مرض التوحد من الأخطاء الشائعة ، فهو اضطراب تطوري (اضطراب نمائي) وليس مرض.

Date

2018/11/13

Profile pic

بدوافع شخصية بعد تشخيص طفلي باضطراب طيف التوحد بدأت العمل في مجال التنظيم المجتمعي والعمل الاجتماعي بهدف الوصول إلى الحقوق الأساسية للأطفال ذوي الاحتياجات الخاصة. خلال هذه الفترة أسست ملتقى طيف التوحد، اكتسبت خبرة وتاريخًا في العمل كمدير مجتمعي بمنصة حبايبنا.نت من خلال استخدام وسائل التواصل الاجتماعي وأدوات السرد القصصي. لدي أيضًا خبرات في الإدارة، التنظيم والقيادة.

 

اترك تعليقاً