معايير اختيار الكتب في مرحلة الطفولة المبكرة

Date

2018/10/30

Profile pic

خبيرة بالطفولة المبكرة و التدخل المبكر

في هذا الفيديو تتحدث الدكتورة سهى الخبيرة بالطفولة  و التدخل المبكر عن معايير اختيار الكتب في مرحلة الطفولة المبكرة

هلأ معايير اختيار الكتب في مرحلة الطفولة المبكرة وهون بحب أسميها كتاب مش قصة، لإنه إحنا فعلياً بنبني ثقافة احترام الكتاب عند الطفل من عمر كتير صغير. الأعمار الصغيرة إلي أقل من 9 أشهر بنركز إنه الألوان تكون فيها تغاير كبير، يعني نقول أبيض وأسود مثلاً، فيها الصور إلي هي بالطبيعة أصلاً فيها تغاير عالي متل الحمار الوحشي، متل الباندا، متل الخروف على سبيل المثال، الأشياء إلي فيها تغاير لتجذب الطفل أو نظر طفل وتساهم في تنمية قدراته البصرية من عمر كتير صغير خلينا نقول أشهر.

هلأ لما يكبر الطفل شوي برضو بدنا نستمر في إنه نستخدم أدوات مناسبة متينة مثل خلينا نقول الكتب المقواة، مثل الكتب القماشية، بده يكون فيها كمان لحتى تسهل عليه إنه يمسكها ويتصفحها، كمان بده يكون الأشياء هاي تفاعلية، تفاعلية كيف؟ يعني تشجع الطفل إنه يبحث عن شيء، ممكن يكون فيها شبابيك، ممكن يكون فيها نوافذ، في شي مخبى بده يدور عليه، فبالتالي هي بتلبي المراحل النمائية إلي حكينا عنها في الأسئلة الأولى من حيث الاستكشاف والبحث وبقاء الشيء إلخ...

كمان بنفس الوقت يكون فيها كلمات ولكن الكلمات بدها تكون بسيطة، التركيز على الصورة أكتر من الكلمة، وبننتقل شوي شوي لحتى يصير في جملة ولكن برضو بده يكون فيه تركيز على صورة، الصورة تحكي عن العبارة إلي موجودة، يعني مش صورة موجودة بس ملهاش علاقة بالعبارة إلي موجودة. أهم شغلة لما بنحكي في قراءة الكتب واختيار الكتب للأطفال إنه العناوين تكون إيجابية، يعني على سبيل المثال أنا القصص الإجتماعية إلي بدي استخدمها مع طفل بخاف، ما بدي أقول لا أخاف!، أو أنا أخاف، أو بديش أقول كلمات سلبية تعطي للطفل مفهوم سلبي عن القصة، وكتير من الأحيان بقولك ما هي اسمها لا أخاف، لأ الطفل بسمع الجزء الأخير من الكلمة وبالتالي حيسمعها أخاف. فإحنا بدنا نركز على عبارات إيجابية أنا جريء مثلاً، أنا مُحب إلخ...، ما بدي أركز عالكلمات السلبية في عناوين الكتب إلي بدي اختارها للأطفال.

Date

2018/10/30

Profile pic

حصلت على الدكتوراة في التربية الخاصة سنة 2008 من مؤسسين التدخل المبكر في الأردن عام 1994 عن طريق مشروع للمكفوفين وأول منسق لبرنامج بورتج 1997 خبرة تمتد لأربع وعشرين عام في مجال التدخل المبكر، أم لخمسة أبناء

 

اترك تعليقاً