ما هي أهم الأسباب التي تزيد من تتشت الانتباه عند الأطفال الصغار؟

Date

2018/11/05

Profile pic

مستشارة تربوية ومدربة حياة

في هذا الفيديو  تتحدث  المستشارة في الشؤون التربوية الخاصة دينا خفش عن أسباب زيادة تشتت الانتباه عند الأطفال الصغار. 

السؤال عم بنقول إيش الأشياء إلي بتخلي الطلاب أو الأطفال يزيد التشتت عندهم؟ هلأ فكرة التشتت إنه في إشي عم بلهيه في أشياء عضوية يعني ممكن يكون مرض بدنا نشوف صحته ودماغه وكل إشي شغال صح وامتحانات تثبت عند دكاترة مختصين وفي المسببات الخارجية إلي هي من ضوضاء لاستخدامه للكمبيوتر أو التلفزيون من عمر صغير أو أي عامل خارجي الطفل ممكن يتشتت تفكيره ويبطل يعطي التركيز إلي هو بده إياه. 

لنقلل إذا مش مشكلة التشتت أو فقد التركيز إشي عضوي يعني إذا هو إشي تاني بنبلش فيه من عمر صغير نفكر فيه قبل ما نبلش نخلف ونفكر، يعني مش أسهل طريقة لراحة الأم إنه أعطي الموبايل لابني يلعب عليه فبلتهي لإنه هاد بسبب تشتت تفكير عنده بالمستقبل، إذا بتتذكروا على الأجيال جيلي والجيل الأكبر شوي إنه أصغر أغنية لأم كلثوم ساعة ونص وإحنا قاعدين بنشوف بني آدم واحد قاعد قدامنا تركيزنا عليه وفش إشي نلعب فيه بإيدنا وبس عم نحضر أغنية لأم كلثوم هاد هو أما هلأ إذا بتفتح أي فيديو كليب عربي أو أجنبي أو أي أغنية أو أي فيديو بين كليب وكليب في ثانيتين إذا تلاتة بزهقوا! وإذا الفيلم إلي بحضره أو اللعبة أكتر من 4 - 10 - 20 دقيقة الولد بزهق ببطل يشتغل عليها، صارت الفترة الزمنية للواحد يقدر يركز فيها من إحنا كنا ساعة ونص عم بتصير هلأ بالعلم عم بنقول 6 دقايق إشي بقول 5 دقايق إشي بقول 3 دقايق برضو تفاوتت الأرقام بس بالمحصلة إنه التركيز تبعنا إحنا بقل. 

ما بدنا نكون إحنا كأهل من الناس الداعمين لنقلل تشتيت الطلاب والأولاد فإحنا عشان هيك بنقول فرضاً ممنوع نهائياً تلفزيون وانترنت وأجهزة الكترونية على أقل أنا نصيحتي من عمر 3 سنين، ما يشوف التلفزيون ولا إشي ولا أي برنامج، يسمع أمه ويسمع أبوه احكوا مع ولادكم خلفتوهم تعاملوا وتواصلوا مع أولادكم لياخد منكم المعلومة. بس يكبر الطفل شوي أكتر من نص ساعة باليوم ما بصير لعمر فرضاً 7 سنين، الساعة بتزيد لحد أقصى ساعتين لما يصير عمره فرضاً 10 سنين وشوي شوي ممكن نزيد أكتر إذا مضطرين إنه هيك المجتمع بده أو هيك الدراسات وعندهم واجب بالمدرسة وبده يحل عالكمبيوتر هاد إشي، تانياً اختيار إيش يحضر يعني فرضاً في برامج بتخلي تركيز الطفل محدد إذا بفتح إله أي إشي يحضره عالتلفزيون الصوت بأثر، طريقة المعلومات إلي بتنعطى بتأثر فبدنا نراقب أولادنا إيش عم يحضروا حتى تركيزهم ما يتشتت. 

فرضاً راح أعطي بعرفش دعاية بتكون أو لأ بس أنا من الناس إلي بحب إشي إسمه بيبي اينشتاين هاد ببلش فرضاً من عمر الولادة - 3 سنوات وبعدين 5 و 7 سنين وبكبر بالموضوع، مع إني أنا بقول من الولادة - سنة ما يحضر بس على الأقل بسمع، هو بيتهوفن وأغاني على آلية وحدة بيعطي الطفل تركيز معين ليسمع إشي، لما يحضر هو نمط أو تنتين بلونين، تركيزه محدد بس 100 إشي تطلع شغلة ورا شغلة مشكلة، أنا من الناس إلي بتفاجئ إذا في أهالي بيقبلوا أولادهم يحضروا إشي زي سبونج بوب! ما يزعلوا منا سبونج بوب بس يعني لا الصوت ولا المنطق إنه اسفنجة بالمي وبتتبلل ولا المفاهيم ولا الألوان ولا التداخل ولا القصة مناسبة للتطوير! شو الهدف؟ ما التطوير إلي الطفل بده ياخده لما يحضر أي نوع من أنواع البرامج إلي أنا بسمح لابني أو بنتي يحضروها؟ المطلوب من الأهل يركزوا أكتر إيش نوع الإشي إلي ولادهم بحضروها وبتعرضوا لإلها، هاد تعرض كيف بقول بدي أعرضه لشمس أو أعرضه لألتراساوند وأنا عم بعرضه عبرامج بتخلي تشتته يروح إذا أنا بعرضه للإشي الصح إلي بزيد من تركيزه ما بنقصه، بدنا ننتبه برضو على هاد الموضوع.