طرق دعم أهالي الأطفال ذوي اضطراب طيف التوحد

Date

2018/10/31

Profile pic

أم طفل لديه توحد

في هذا الفيديو  تتحدث سناء شاكر ام لطفل من ذوي اضطراب طيف التوحد عن طرق دعم أهالي الأطفال ذوي  طيف التوحد

النسبة للأشياء إلي ساعدتني كتير بإني أتخطى هاي المرحلة الصعبة فحياتي إلي هي كانت أول ما اكتشفنا إنه يحيى عنده مشاكل تطورية طبعاً كان أول واحد هو زوجي كتير ساعدني، كتير وقف معاي، كتير أيد كل القرارات إلي أنا اتخذتها، يعني سافرت من بلد لبلد، سافرت من أبو ظبي جيت هون على عمان حتى إني أقدر أساعده أكتر، ويعني تفرقت العيلة هو اشتغل بمحل والعيلة كانت بمحل ومع ذلك ضله صابر وواقف معنا كله كرمال يحيى. وطبعاً كمان إلي ساعدني كتير هم عيلتي من إمي أبوي أختي أخوي ومرت أخوي كمان، إلي حبو يحيى من كل قلبهم وإلي كانوا دايماً مستعدين يساعدوا بكل إشي من مشاوير إنهم مثلاً يهتموا بيحيى في حالة أنا سافرت أو أنا رحت أشوف صحباتي غيرت جو كانوا يهتموا فيه ويحبوه ويطلعوه ويمشوه يعني العيلة الكبيرة كتير كان إلها دور فعال إنه أنا اجتزت هاي المرحلة.

شي تاني كمان كتير مهم وإلي أنا دغري بلشت أدور عليه ولقيته الحمدلله ولقيته وكان كتير أحلى مما تخيلت، هو support group إلي هو عبارة عن أمهات زيي من بيئتي، من مستواي الثقافي والإجتماعي إلي بعانوا زيي من أطفال عندهم تحديات تطورية مش بعانوا يعني أو خليني أقول عندهم أطفال لإنه هي مش معاناة ع كل حال، فهدول كمان صرنا كتير صحبة مع بعض وبنفهم بعض وبنأيد بعض وبنشارك بعض بتجاربنا المختلفة، فكانوا إلهم كتير الفضل بإنه أنا كمان أتخطى هاي المرحلة. وكمان بحب أشكر وأقول إنه كتير ساعدوني المركز إلي أنا حطيت فيه يحيى إلي كان فيه معلمات كتير فهمانات وكتير عارفات شو بيعملوا مع هدول الأطفال، كتير وقفوا معاي، وكتير ساعدوني بالبرامج التأهيلية وبمختلف الأمور إلي قدرنا إحنا نوصل فيها مع بعض حتى إنه ساعدنا يحيى، فهدول هم الأساسيات إلي ساعدتني في إني أتخطى المرحلة الصعبة إلي أنا كنت بمر فيها.

مرض التوحد(Autism)  من الأخطاء الشائعة  فهو اضطراب تطوري (اضطراب نمائي) وليس مرض.