رحلتي مع ابنتي الشابة ذات الشلل الدماغي

Date

2018/11/04

Profile pic

أم لشابة لديها شلل دماغي

في هذه الحلقة تتحدث ريم أم لشابة لديها شلل دماغي عن رحلتها مع ابنتها ذات الشلل الدماغي.

لما اكتشفنا مرض بتول، اكتشفنا من عمر 6 شهور، كانت ما تقدر تقعد ولا تزحف، فأنا رحت يعني ع أكثر من دكتور، وكانوا يقولولي أول إشي مدام عادي، طبيعي الوضع لإنه هي يعني خداج وجاي قبل أوانها، لإنها هي اجت سباعية، وقعدت في الحاضنة لمدة شهر تقريباً، فيعني كانوا يقولوا عادي عادي، التأخر طبيعي، بس لحد بلوغها السنة تقريباً، شخصوها الدكاترة -أكثر من دكتور- إنه معها شلل دماغي، وقالولي إنه لازم تروحي فيها على مؤسسة تابعة، يعني بتختص بالشلل الدماغي، بس ما كان الوضع قبل 22 سنة زي هلأ، يعني هلأ بكبسة زر، وفي يعني التقدم، والأطباء كتير، يعني صار غير عن أول. 

قبل 22 سنة ما كان كل هاد الحكي، وكانت مثلاً مؤسسة وحدة، مش زي هلأ عدة شغلات، وعدة أبحاث، وعدة شغلات صارت وتقدم صار، فكان الوضع صعب شوي إنه على هوا التشخيص، ع هوا إنه وين أروح فيها؟ وين أعالجها؟ شو بدها علاج؟ شو بدها يعني كمستقبل، شو مستقبلها؟ فما كانت كل هاي التطورات إلي هلأ إحنا يعني بنعيشها كانت موجودة، فكانت أصعب، هلأ لأ الوضع كله تغير.