تعزيز ثقة طفلي ذو الشلل الدماغي بنفسه

Date

2018/11/05

Profile pic

أم طفل لديه شلل دماغي

في هذا الفيديو تتحدث زينة أم لطفل لديه شلل دماغي عن كيفية تعزيز ثقة الطفل ذو الشلل الدماغي بنفسه 

اليوم بدي أحكي عن الثقة بالنفس بالنسبة لولادنا ذوي الإحتياجات الخاصة، هلأ ما بدي أحكي وكأني عم بتفلسف إنه أنا كنت حاطة هاد الهدف، الهدف اجى من طريقة الحياة إلي صار إنه أشياء كتير سوت ثقته بنفسه وعززت ثقته بنفسه بالبداية مثلاً لما صورناه مع حبايبنا الموضوع صار لما نروح مشوار يقولوله الولاد إنت إلي تصورت مع حبايبنا؟ إنت الطفل إلي تصورت مع حبايبنا؟ فحس حالة هو شخص مشهور، وصار ينكت وصار يطلب قنوات تيجي تصوره، هو طبعاً هيك عم يحكي، بس حسيت أنا بعد كم شهر الموضوع عزز ثقته بنفسه، صار كتير واثق إنه يطلع مع الناس، إنه يحكي، يحكي عن حياته.

بالإضافة لأشياء تانية مثل مثلاً أنا حسيته بحب يرسم فدايماً في عنا ألوان، ألوان مائية، ألوان خشب، ألوان شمع مشان يرسم، لما كان في إحدى المراكز كان دايماً يروح في رسمة، ويعني رسمة مخلصة، مساعدينه، فش عنده فراغات، صرت أقوله والله إنك رسام، والله إنك فنان، هاد الموضوع قلب صار يرسم أكتر، صار دايماً عندي ورق وألوان مائية وألوان خشب وألوان شمع، فهو صار حاط هاد الهدف براسه إنه بدي أصير رسام، بدي أصير فنان، وبتمنى إني أحطه بدورة رسم محترف لإنه بحسه بما إنه ابني عنده مشاكل حركية فحركته بإيديه رح تساعده فهاد الموضوع بالزبط كمان عزز ثقته بنفسه وزي ما حكيت بالبداية ما كان الهدف إني أنا بدي إياه إنه اه بدي اشتغل عالثقة بالنفس اجت من ضمن الحياة، فبدعوا كل الأهالي إنه نشتغل على هاد الموضوع، شو ما كانت مشكلة ابنك يا ريت نعزز ثقتهم بنفسهم، بالعكس الناس لما بشوفوا ولادنا عندهم ثقة بالنفس وأنا واثقة منه ومن قدراته مع إنها مش زي إلي قده بس عنده ثقة بحاله، هاد الإشي بدعمهم وبساعدهم إنه يشتغلوا على شغلة معينة.