تأثير وجود طفل من متلازمة داون على العلاقات الأسرية

Date

2018/11/25

Profile pic

أب لطفلة من متلازمة داون

في هذا الفيديو  يتحدث مشهور أب لطفلة من متلازمة داون عن تأثير وجود طفل من متلازمة داون على العلاقات الأسرية

شو تأثير جية نوف على عائلتنا؟ يعني هاد سؤال صعب لأنه بياخدك برحلة صعبة كمان، بالنسبة الي بمرق شريط صعب براسي، أول شي هو امتحان للعلاقة الزوجية، امتحان صعب جداً، بتكون أنت و زوجتك في مكان مظلم و أحاسيسك كلها سلبية، حزن، غضب، يعني بمتحن هاي العلاقة لأبعد حدودها و الضغط الفظيع هاد إما بولد انفجار و انفصال للأسف أو اما بولد علاقة متينة و بطلع منها ألماس و ياقوت، والحمدلله فحالتي يعني أنا ميقن أنه ولد ألماس و ياقوت و علاقة مترابطة، هاد على الصعيد العلاقة الزوجية الصغيرة والعائلة الصغيرة، أما العائلة الكبيرة برضه هو يعني مقياس لترابط الأسرة لأنه الناس بتشوفك في أسوأ حالاتك و أنت في قمة غضبك و قمة حزنك، بيت حماك بشوفوك في أسوأ حالاتك و بتحملوك و بوقفو جنبك، أهلك نفس الشي، أخوانك، أصدقائك.

 بس برجع من الشغلات الي برجع بتذكرها، كلمات بسيطة أثرت فيي كثير أول ما تخبرت عن نوف، ردة فعل عمي أبو علي، رحمة أبو علي، كان جوابه: بدك نجمع العيلة و الولاد عشان تشرح لهم و تقلهم شو مطلوب منهم؟ يعني هاد لحاله حسسني كل العيلة وراي، مرة عمي حكتلي كلمة جداً أثرت فيي، قالتلي : نوف محظوظة جداً أن هي انولدت في عائلة بتقدرها و بتصونها و بتطلعها للمجتمع بأحسن صورة، هاد كتير فعلاً أثر فيي بيوم أنا كنت كتير حزين فيه، العيلة شي مهم و احنا بمجتمعنا نوعاً ما يعني أحسن من الغرب أعتقد بهاد الشي، دعم العائلة دائماً موجود، بتحسه موجود بس الواحد لازم يعني يحاول ينتقل من مرحلة الحزن و الغضب شوي لأنه إذا طولت للأسف هي الي بتسوي أغلب المشاكل و للأسف عم بنشوفها كتير يعني عم بتسبب في فشل بالعلاقات الزوجية وبتفكك العائلة.

Date

2018/11/25

Profile pic

يعمل في مجال اللوجستيك، لديه عدة هوايات من ضمنها الطبخ والإهتمام بالسياحة. متزوج من هبه ولديهم ٣ أطفال العنود ٩ سنين ، نوف ٨ سنين وبسام ٨ شهور. ولدت نوف وهي من متلازمة داون .يعبّر مشهور عن مشاعره ويقول كانت رحلة شيّقة

اترك تعليقاً