الفروق الفردية بين الأفراد بشكل عام

Date

2018/11/01

Profile pic

أم طفل لديه شلل دماغي

في هذا الفيديو  تتحدث زينة  أم لطفل لديه شلل دماغي عن الفروق الفردية بين الأفراد بشكل عام في مجال التعليم

تعلمنا أشياء اسمها الذكاءات، إنه ربنا خلق ذكاءات مختلفة عند الإنسان طبيعي و ذو الإحتياجات الخاصة، ذكاءات مختلفة مثل الذكاء الاجتماعي قدرة الإنسان إنه يتواصل مع أشخاص من مختلف الثقافات و الخلفيات و المستويات، الذكاء العلمي بنلاقي في أشخاص بحبو من صغرهم المواد العلمية مثل: الكيمياء الفيزياء الأحياء، الذكاء الرياضي الناس إلي بتحب الرياضة بمختلف أنواع الرياضات، الذكاء الموسيقي لما نقول شخص صوتو حلو، عنده حس موسيقي، التعلم على الآلات عنده سهل من أشخاص تانيين، عندك الذكاء النفسي إنه كيف يفهم الناس، ويفهم نفسيات الناس، فالذكاءات مختلفة ربنا خلقها فينا، فلما نقول طفل ذو احتياجات خاصة هو عنده نقص بهاي الذكاءات زي الإنسان العادي، لما كنا بالمدرسة ونقول هاد الشخص مو شاطر بالمدرسة، بس لما كبرنا و اكتشفنا إنه الشخص إلي ما كان شاطر بالمدرسة نجح في الحياة العملية فهاي؛ لأنه عنده ذكاءات مختلفة قدر يستغل هاي الذكاءات إلي هو قوية فيه و ركز عليها و نجح في الحياة.

بالنسبة لأطفالنا نفس الإشي، الناس إلي بتطلع إنه هم ضعاف هم مش ضعاف، الناس جميعاً بمختلف شرائحها من طبيعيين و ذوي احتياجات خاصة عندهم ذكاءات مختلفة، عندهم أشياء أقوى من أشياء؛ لأنه الكمال لله سبحانه وتعالى في النهاية و ما في حدا كامل، فلما يقولو ولادهم ضعاف، إحنا ولادنا مو ضعاف، أنا بطلع عليها بناحية إنه ربنا أخد إشي وأ عطانا إشي بداله، مثلاً أنا عندي يوسف أوكي حركته مشكلة، عنده أشياء فيها مشاكل، بس عنده ذكاء اجتماعي فظيع، يعني بيلقط الشغلة، عنده ذكاء اجتماعي إنه يحكي مع كل الناس ما عنده مشكلة، حتى إنه هو حكيه و نطقه أصلاً في صعوبة و مع هيك بحب يحكي مع الناس كبار صغار أطفال مع ناس كبار، لدرجة إنه بكون قاعد مع الناس بيحكو فموضوع سياسي.. اجتماعي.. برحلة.. إيش ما كانو عم يحكو، عنده القدرة إنه يتواصل معاهم في الموضوع إلي هم يحكو فيه و يصير يخزن معلومات، فهاد إشي بالتعليم. 

بالنسبة لكيف نتلقى المعلومات إحنا كبشر يا إما سمعيين بنحب نسمع المعلومات زي كيف بنسمع الأخبار، أو بصريين بنحب نشوفه كفيديو أو نشوف شخص قدامنا عم يحكي، وهدول الأشخاص البصريين لما بتحكي إشي بموضوع قدامهم هم عم يتخيلو الصورة، يعني إنت عم تحكي رحنا عالبحر عطول الشخص البصري بيتخيل صورة البحر، رحنا عالجبل بيتخيل صورة جبل، في ناس حسيين زي بنكون إحنا بالرياضيات لما بنعلم الأولاد بنقول إنه اتنين زائد اتنين، الشخص الحسي شو بكون، بكون بقول مكعبين زائد مكعبين اجمعهم و الأشياء قدامه و محسوسة و عم بحسها بِعدهم بصير و أربع مكعبات، بنفس الطريقة الأشخاص الطبيعيين بيتعلمو و الأشخاص ذوي الاحتياجات الخاصة بيتعلمو، فأنا بضل أحكي ما في مشكلة التنين نفس الإشي، بس زي ما قلت ناس الله أخد أشياء و أعطى بدالها أشياء.