العطاء المتبادل بين الأشخاص ذوي التأخر التطوري وأهاليهم

Date

2018/11/12

Profile pic

أم لطفلة من ذوي التأخر التطوري (التأخر النمائي) وفرط الحركة

في هذا الفيديو  تتحدث رولاند البواب أم لطفلة من ذوي التأخر التطوري وفرط الحركة عن العطاء المتبادل بين ذوي التأخر التطوري (التأخر النمائي) وأهاليهم.

من خبرتي كأم لليلى، و صارلنا 10 سنين برحلة العلاج، و رحلة البحث و التحري بحس أنه هدولا الأطفال، كا ما تعطيهم و تشتغلي معهم هم رح يعطو، صرت متأكدة من هاي الشغلة، طبعا ما بدي حدا يفهمني غلط ، إنه رح يتحسن ،لأ مش هذا القصد  قصدي أنه كل ما أشتغل معهم، هم أكيد رح يعطوني، بس رح يعطوني بقدر هم يقدروا عليه، وهم بقدرو يحققوه، وينجزوه ،عشان هيك دائما قد ما تقدر تعطي ابنك من محبة وتعطيه من وقتك، وتعطيه شوية مسؤوليات يعني ماما تعاي ساعديني بالبيت هون، تعالي احنا ننزل على المخبز نجيب خبز نجيب كذا ، انسي الناس الي بطًلعو عليك ، طبعا مو سهل، أنا ما كنت هيك من أول، كنت دائما أقلق بحكي الناس و نظرات الناس، يمكن هسا تمسحت ما بتفرق معاي الإ بنتي.

 

يمكن أنا أقوى وحدة بالبيت عنا، لسا يمكن إخوانها بطلعو ماما اطلع علينا، ضحك، ما حدا دخلو؛لأنه أنا بالآخرما حدا معطيني اشي، و ما حدا جاي يساعدني ببنتي، فأنا بعمل الي بلاقيه مناسب، و الي بقدر انو يسعد بنتي ، يعني هي سعادتها ليلى لما تنزل على المخبز و تشتري خبز و تخليها و الي واقف  وراي يستنى، ليلى هسا دورها و بدها تشتري الخبز و بدها تعطي المصاري و بدها ترجع، طبعا هاي كلها أشياء بتساعدها و تنمي قدراتها و مهاراتها .

 

فهاي دائما رسالتي للأهل ، خدوهم وما تخبوهم بالبيت ، طلعوهم لأنه كل ما تعرضيها للمجتمع الي هم عايشين فيه، صدقيني هم رح يتحسنو، لو كل شوي  لو كل مشوار لقطتلها اشي صغير، طبعا في حالات يمكن صعبة، يمكن تقول ما بقدر اخذ ابني على المول، انتي مو ضروري تقعدي بالمول نصف ساعة، و ساعتين و ثلاث، خذيه أول مرة ربع ساعة ، عشر دقائق وروحي، ابدي هيك شوي شوي حتى ابنك بكرا يقعد معاكي ساعة كاملة بالمول بدون ما يعمل أي سلوك، طبعا احنا كمان ما بصير نرهقهم، هم ممكن يتعبو بعدها ببدو بالسلوكيات الخطأ ، فدائما افهمي شو حاجات ابنك أو بنتك و امشي على الإشي الي انتي بتشوفيه مناسب و ما تطلعي كثير و ما تسمعي كثير، طبعا بدها وقت كثير و بدها صبر كثير لحتى تقدر توصلي للدرجة و أنا لسا بضلني أتعلم و بعمل، و ما بحكي أنا عن خبرة لسا فظيعة، أنا لسا ما الي إلا عشر سنين بس، تقول من عمر 4 سنين و هسا عمرها 14 سنة ، بس هذا علمني، يعني وضع ليلى هو الي علمني يمكن هيك أكون.

Date

2018/11/12

Profile pic

أم لأربعة أبناء، أصغرهم ليلى من ذوي التحديات التطورية، تم تشخيص إبنتها على عمر ٤ سنين باضطراب فرط الحركة والتأخر التطوري (التأخر النمائي)، وبدأت من بعدها رحلة العلاج، تعتبر ليلى هدية من رب العالمين وأهم علاج هو الحب والتقبّل. أصبحت عضوة في عدة جمعيات لمساعدة الأطفال وتغيير نظرة المجتمع للأطفال ذوي الاحتياجات الخاصة.

 

اترك تعليقاً