أمور تعلمتها من ابنتي ذات الشلل الدماغي

Date

2018/11/04

Profile pic

أم لشابة لديها شلل دماغي

في هذا الفيديو  تتحدث ريم محيسن أم لشابة لديها شلل دماغي عن الأمور التي تعلمتها من ابنتها ذات الشلل الدماغي.

بتول علمتني كتير بالحياة، علمتني أول إشي تستغربوا يعني، الثقة بالنفس! يعني أنا طبعاً عندي ثقة بنفسي، بس هي يعني عززت الثقة بالنفس كتير، يعني خلتني مثلاً إنه أحب الحياة أكتر، وأتطلع ع الحياة بنظرة تانية، يعني لا تستغربوا ولادنا ممكن يعلمونا كتير شغلات، وعلمتني تقبل الناس، الناس كانوا دايماً يعني مثلاً يتطلعوا عليها كإنها إشي غريب! أو مثلاً وين ما نروح بأي محل إنه يصيروا يتطلعوا عليها! تقولي ماما عادي، فأنا كنت أتحسس كأم يعني أو هيك في بعض الأشياء يعني إنيّ أتحسس منها، بس لأ، أنا بتول كتير كتير علمتني، إنه الصبر كمان علمتني، علمتني الثقة بالنفس، علمتني إنه أتقبل الآخرين. 

علمتني إنه الحياة يعني حلوة، الحياة فيها أمل يعني أنا كنت مثلاً بتيجيني فترات إنه أنا يصير عندي إحباطات، بس بتول كتير يعني قامت هاد اليأس من حياتي، لأني لما أشوفها هيي يعني كطفلة، هي هلأ صبية عمرها 22 سنة، لكن أنا بضل أشوفها كطفلة! ولما كانت صغيرة إنه هالقوة إلي عندها، هالإصرار، هالصبر، هالتحمل! تحمل نظرات الناس، تحمل معاملات الناس، كتير أعطتني ثقة ويعني حب للحياة، فأولادكم اعتنوا فيهم، وحبوهم، أكيد أكيد أكيد بتلاقوا، يعني هم رح يعلموكم كتير دروس في الحياة.