أمور أهتم بها عند السفر مع طفلي ذو اضطراب طيف التوحد

Date

2018/10/31

Profile pic

أم طفل لديه توحد

في هذا الفيديو  تتحدث سناء شاكر أم لطفل من ذوي اضطراب طيف التوحد عن أمور تهتم بها عند السفر معه.

هلأ بالنسبة للسفر مع الأطفال بالذات أطفال التوحد في كذا إشي ممكن يساعد الأهل، هلأ أول إشي وأهم إشي اعملوا تقرير عند دكتور قبل ما تسافروا، واختموا هاد التقرير وخدوه معاكم، خليه بمتناول إيدكم، مثلاً أنا صارت فيي قبل هيك مرة بوحدة من المطارات إنه كنت بدي أمرق من ذوي الإحتياجات الخاصة على الـ Border وما قبلوا يدخلوني لإنه ما صدقني إنه ابني عنده توحد، لإنه بالذات أطفال التوحد بكون بكون شكلهم عادي يعني ما ببين عليهم أي إشي، فكتير تغلبت طبعاً لمرقت من عند الكنترول ووقفت بالصف وبالدور مع يحيى كانت كتير صعبة، فهاد التقرير كتير مهم، لإنه صارت كمان مرات على الطيارة نفسها إذا الولد انزعج من إشي معين وصار يبكي أو يخبط أو يطلع صوت صارت عكتير مرات من الرحلة نفسها ينزلوا الولد وأهله، فهاي كمان إذا كان معاكم تقرير ساعتها يثبت إنه الولد معاه توحد ممكن إنه الامور تختلف وإنه تاخدوا حقكم بالسفر. 

هلأ في كتير مرات لازم تخلوا مثلاً إذا الولد بهرب مثلاً كتير من أطفال التوحد ممكن يهربوا بالمطار، المطار فيه ناس كتير، بكون كتير منيح لو بتحطوا على رقبة الولد أو على إيده مثلاً عنوانه، رقم التلفون إلي بقدروا إنهم يتواصلوا معاكم فيه في حال إنه الولد مثلاً هرب لحظة من بين ايدين أهله، هلأ في حالة الأطفال إلي بياخدو أدوية كمان لازم تهتموا إنه لازم تاخدوا الأدوية معاكم، في حال اتأخرت الطيارة في حالة اضطريتوا تستنوا يقوم يجي موعد الدواء والولد ما يكون موجود دواه هون ممكن يتنرفز، ممكن يصير يبكي، فهاي برضو رح تغلبكم، وخدوا قد ما بتقدروا أشياء هو بحبها سواء أكل، ممكن ياكل إشي بحبه مثلاً sticks أو carrots أو عصير أو إشي هيك، إذا بحب ألعاب معينة يلعب فيها من كتب، دفاتر تلوين، مثلاً أنا ابني بحب الآيباد فدايماً باخد إله الآيباد تبعه معاه ولا ماله بلهيه، بلهيه مثلاً بتقولوا ربع ساعة وبعدين بنرجع نتمشى، بنرجع نقعد، بنرجع بنشوفه كمان ربع ساعة فيعني خدوا أشياء هو بحبها وبقدر شوي إنه يلتهي فيها. وبالسلامة.

مرض التوحد(Autism) من الأخطاء الشائعة ، فهو اضطراب تطوري (اضطراب نمائي) وليس مرض.